كلية الخدمة الاجتماعية
كليه خدمه اجتماعيه جامعه ...........................................
ودي مؤهلها بكالوريوس خدمه اجتماعيه ومصر كلها فيها 3كليات
( حلوان - اسيوط - الفيوم )ودي بتقبل من مرحله اولي وتانيه ولو لسه باقي مكان ممكن ثالثه حسب النتيجه
وفيه معاهد خدمه اجتماعيه بتدرس نفس المواد بس بمصاريف خاصه
ومؤهلها بكالوريوس او دبلوم خدمه اجتماعيه لو كان المعهد سنتين والمعاهد كتير جدا منها بنها وكفر الشيخ ومدينه نصر ودمنهور وتقريبا كل انحاء الجمهوريه من اسكندريه لاسوان
((خريج الخدمه الاجتماعيه )) حاجه من الاتنين :-
1- اما اخصائي اجتماعي مؤهل ومدرب
2- عضو من اعضاء هيئه التدريس (الاوائل ) طول الاربع سنوات
(( بدايه ظهور الخدمه الاجتماعيه )) :-
اول ظهور لها من ايام الحرب العالميه طبعا كان فيه جرحي وايتام
ولازم لهم حد يداويهم وكان زي الزائر الصحي كده ولما اكتشفوا ان الحرب نتج عنها ايتام وارامل ومعاقين لازم حد يساعدهم ويقدملهم خدمه موجوده في المجتمع ولازم نعملهم مؤسسات ترعاهم
عشان كده بدات تظهر حاجه اسمها خدمه اجتماعيه او عمل اجتماعي عشان الناس دي تتساوي بباقي افراد المجتمع الاسوياء ويخدوا حقوقهم من المجتمع
((والخدمه الاجتماعيه لها مبادئ وفلسفه ))وهي الايمان بقيمه الفرد وادميته واحترامه واحترام كرامته وتحقيق مبدأ العداله الاجتماعيه بين الافراد
((اخصائي اجتماعي)) :-
ده خريج الكليه بيهتم بدراسه السلوك الانساني وقادر علي احداث التغيير الايجابي للمجتمع وبيساهم في حل المشكلات وبيقدم حلول واقتراحات للحالات وبيساعدهم علي تحقيق مصيرهم وبيقدم المشورة والنصيحه لهم وبيتابع الحاله في كل المجالات
وده شغله بيكون علي 3 محاور :-
1- خدمه فرد بيقرب من الحاله وبيدرسها كويس وبيعرف ابعاد المشكله اي كانت وبيساعده علي كيفيه حلها وبيدرس سلوكيات الافراد وبيكون علاقات مهنيه بينهم ودي ماده لذيذه جدا وممتعه وشيقه واي حد يحبها
2 خدمه جماعه ودي بيدرس فيها او بيتعامل مع جماعات المؤسسه يعني جماعه في فصل او في جامعه او جماعه في الاحداث او جماعه في مستشفي او جماعه امهات لاي فئه ودي بيقدم الخدمه جماعيه زي رحلات ومعسكرات وندوات ومؤتمرات ومهارات ومناقشات جماعيه وزيارات و...الخ وبيدرس سلوك الجماعه ككل
اما تنظيم المجتمع او تخطيط المجتمع وده قسم بيدرس المجتمع ككل زي المدرسه كلها او الكليه او المستشفي او مركز الشباب او مؤسسه تأهيل وهكذا وده بيدرس مشاكل المجتمع ككل وبيعرض حلول ومقترحات مع تدخل الاهالي وصفوه المجتمع
((ايه هي مجالات الخدمه الاجتماعيه ؟ ))
ميزة الخدمه الاجتماعيه انها بتدخل في كل المجالات بالمجتمع
المدارس -والمستشفيات- والجامعات رعايه الشباب الجامعي-ومؤسسات التأهيل للمعاقين -
مؤسسات مكفوفين وصم وزوي احتياجات ودار الايتام
الشئون الاجتماعيه والتضامن - دار المسنين ومراكز رعايه الامومه والطفوله
مراكز الدفاع عن المرأه ومكافحه المخدرات مراكز اطفال الشوارع - محكمه الاسره - يعني كل مجالات المجتمع
((اما عن نظام الدراسه في الكليه او في المعهد ))
الدراسه لمده اربع سنوات ودي بتقريبا بتدرس كل المواد
لان الخدمه الاجتماعيه بتدخل في كل المجالات زي ( مجال مدرسي اسم الماده مدرسيه- مجال طبي طبيه - مجال تأهيل معاقين - مجال مسنين - منظمات المجتمع ونشأتها واهدافها - انجليزي - خدمه فرد - خدمه جماعه - تنظيم مجتمع - تخطيط - اداره - علاقات عامه - احصاء - طفوله - علم الانثر بيولوجي علم دراسه الانسان - فروق فرديه - مناهج بحث - علم نفس وعلم اجتماع ريفي وحضري - سياسه - شريعه اسلاميه - صحه نفسيه - اقتصاد - زيارات - تدريب ميداني - ...الخ
ومع كل سنه دراسه لازم من تدريب ميداني الطلبه بتنزل المؤسسات تتدرب فيها ولازم في سنه 3 بيكون فيه معسكر اجباري وده معسكر اعداد قاده ده للاعتماد علي النفس وتعليم القيياده والتعبيه وكيفيه التصرف في الواقف وبإمكانيات المتاحه امامك
واخر سنه فيه حاجه اسمها حلقه بحث وده مشروع التخرج دي زي رساله ماجستير او دكتوراه مصغره فيها خطوات البحث العلمي وبيتم تطبيق النظري في اي مؤسسه عملي
اما عن الدراسات العليا في الخدمه الاجتماعيه
وده بكون اما بعد تقدير جيد او جيد جدا بياخد دبلومه سنه واحده بس اسمها دبلومه خدمه اجتماعيه في اي مجال من المجالات حسب الرغبه
او لو تقدير امتياز بيدخل ماجستير علي طول
والماجستير اقسام ( فرد - جماعه - تنظيم مجتمع - تخطيط )
وبعدها بيدخل ماجستير وده مقسم لثلاث ترمات بنظام ساعات معتمده
الترم الاول لكل التخصصات والترم التاني التخصص والترم الثالت التدريب الميداني بس لازم النجاح في كل ترم عشان تدخل التخصص
وبعد كده الرساله اقل مده سنه وبعد المناقشه بتكمل دكتوراه
اترك تعليقا:
مرحبا، اهلا وسهلا بكم في الموقع الرسمي لطلاب الخدمه الاجتماعيه علي مستوي جمهورية مصر سواء جامعات ومعاهد خاصه انتظرررررررروا كل ماهو جديد..شكرا
.} 